3月6日後的一些感慨…

近排真係好感慨…

就係當一班Friend講到一些遊行暴力時,聽到有人講:

治亂世用重典“咁就啱啦…

諗深一層…

其實亂世係點黎呢?點解又會變成一定用重典呢?

如果咁講…

係唔係認同六四果時,用坦克車典過去就係啱?

心裡突然有一陣寒…

————————————————————————

講真… 香港近排有去到亂世咁嚴重嗎?

果晚衝擊班人佔真正和平遊行既一萬人只有萬分之幾十人,

根本都唔算乜亂世,或者根本不值一提既小衝突黎…

政府警方高層無賴式高調指責

加上各大主流傳媒將事情無限放大

就咁易令香港人就好似睇連續劇咁煲,

仲要攪無謂既互相對立、分化….

簡簡單單就將派錢後都有萬人和平遊行既人仕妖魔化、

個個都變成唔理性兼比政治人物操控利用既笨人咁…

(希望我係會錯意啦,總之討論當時比我感覺就是這樣…)

—————————————————————————

我都知又唔怪得佢地咁諗, 要生仔、要供樓又要玩樂…

大家工作有壓力,生活又咁忙碌,邊有時間深入理咁多人地事丫~

D政客個個都係為名為利為自己啫~ 個個都係為果份人工做下SHOW之麻~

拆左人地條村又唔係拆我屋企…

什麼時事政事係在CCTVB、免費派果份河蟹頭條,或生果娛樂報睇最方便!

大眾傳媒報道失實又誇大又如何… 我睇得開心當娛樂片睇未得攞~

人云亦云未又點?總之未攪到自己唔好理咁多野啦!

—————————————————————————–

點解咁感慨?

一來可能我自己性格有問題啦…

二來知自己更唔係一個醒目仔,

當有好多野諗唔明就會四週圍搵料補完,

唔想得過且過,唔理就算…

想搵多一些不同渠道,特別一些非主流的媒體,

只覺得值得參考既,就分享出去比大家參考吧了!

 

但…

原來咁都會比人亂帶上有色眼鏡的…

近排有一件事令我特別氣憤…

當大家都討論一些正面事情時,

當中有人比較片面, 有人是比較激動,

其中有些是跑左少少原題目,

但亦帶出好多正面既討論,

竟然無啦啦比人話咁就係叫情緒咁唔穩定!?

 

唔通FB除左講玩樂之外就唔可以傾其他更有意義既事?

講一點香港政事、發表一下不滿就突然變成忿青?

支持一些政客某一些理念就等如比政客洗腦?

未攪到你就諗咁多等如做傻事, 自作孽?

對這政治方面無知就等如心靈或思想純潔?

或者唔應理咁多社會事, 自己玩得開心就算好事?

唉, 真係好傷心… 

————————————————————————

我覺得香港政府依家明明仲有能力有預算做返好自己, 

但香港人唔一齊為依一個目標共同出發,

仲要咁易比有心人玩分化呢?

有得救唔救,要去到最差情況先驚死?

唉…真係好感慨…

 

P.S. 我分享近排覺得比較接近事實, 分折不錯的非主流媒體:
http://www.hkreporter.com/channel_list.php?channelid=297

Share and Enjoy

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS
Bookmark the permalink.

24 Comments

  1. 政治依樣野我冇興趣參與,我也冇興趣知道,只要生活好,有得砌模型,已經足夠….
    [版主回覆04/06/2011 03:56:00]人各有志, 無話什麼生活是對是錯啦~ 我只知道, 幸福唔係必然~

  2. 依家似係末世多過似亂世多。世界各地天災連年,中東一連暴亂,各國經濟大衰退等等… 我諗中國人唔會係今次地震事件可以向日本借鏡到D乜架啦…中國人習性,籠裏雞,即使大難臨頭,都會互插的…歷史已經可以證明。
    [版主回覆03/17/2011 17:10:00]HAHA 成日都有未世預言, 都唔理得咁多啦~ 我地香港人都算幸福的了, 人生大半世都無經歷戰亂, 最黑暗既文革又咁啱過左, 又無大型天災人禍喎!而家離絕望仲好遠路啦! 只要做好自己, 有餘力就幫下人幫下社會, 就夠不枉此生了!

  3. 啊?! 原來你寫o左咁大篇o野…. 而我只係唔想選擇無知地開心過活吧了~ <= 超同意!! 香港人係自殖民地時代已經被洗腦, 好多人都覺得"政治"係洪水猛獸, 正經人家唔應該花時間落去. 無他o既, 一班唔知政治為何物的蟻民對於英國來講係最好統治o既~~ 回歸後香港仍然係被統治呢一點查實並冇改變, 特區政府當然二話不說就繼承前人的政治遺產. 任何事都口誅筆伐咁叫香港人唔好將其"政治化". 但講呢d說話o既人正正就係參予當中o既政治人物, 佢地梗係唔想其他人干擾佢地o既政治工作啦!! 人係要埋頭入沙堆的話, Ya大你都唔駛太為佢地著緊o既. 另一方面, 如其他人因同你政治理念唔同而做唔到friend的話, 係佢唔成熟o者, 唔好太放在心
    [版主回覆03/17/2011 19:03:00]多謝波波支持~ 其實我真係無嬲, 只是有點感慨, 特別依幾日報導 搶鹽搶碘片新聞… 果D搶贏了一大堆鹽既阿毛一面幸福勝利樣…. 反思緊…. 究竟做一個無知既人, 會變"幸福"定係會變'瘋狂'呢?

  4. 其實自由社會, 有不同政見係正常.
    身邊的朋友也有不同政見, 但當你發覺佢地未做選民,
    連票都冇一張, 談論也是傷感情.
    [版主回覆03/14/2011 14:27:00]其實依一方面就正正是我最感慨既地方…. 不同政見唔緊要, 但唔好自己未攪情楚既情況下, 亂咁宣揚及支持一些錯既言論… 比別有用心既人利用… 做朋友是有責任出下聲吧! 當然佢地聽唔入耳都無計…

  5. 唉…我個人要求唔係咁多…但度安安定定咁生活咪幾好…就好似最近日本地震,香港人其實已經好幸福了
    [版主回覆03/14/2011 10:37:00]我本身都係無乜要求既人黎~ 可惜有時就係衰睇唔過眼… 希望中國人能因今次地震事件可以向日本借鏡吧: http://hk.news.yahoo.com/article/110312/4/n6rq.html "日本人顧全大局的心理質素久經訓練,在天災中發揮了關鍵作用,除了自救,亦不忘救人。"

  6. 開左燈既話 睇個低座好似好暗咁~
    [版主回覆03/14/2011 00:37:00]如果夜晚去的話, 開左成日可能已經唔夠電了~ XD

  7. 頭先去C3見到你2個作品呢~龍珠+幪面超人寶座
    [版主回覆03/13/2011 23:38:00]咁有無評語比我呢~

  8. 睇咗你個bldg咁耐都係第一次提呢類政治嘢, 當年我去7.1遊行都俾人話, 今次雖然我無行, 但就好支持你哋一班行出唻嘅人, 能夠敢於舒發自己認為不公平嘅事又可彷? 今日一萬人出唻行, 好過五十萬人再行一次, 其實我哋呢d小市民衣, 食, 住, 行攪得掂, 開開心心有模型砌不知幾happy, 邊咁得閒講政治, 去遊行, 留返俾d政治家自己攪咪算喇, 只不過係而家呢個政府連呢四樣嘢最基本嘅嘢到唔同市民著想, 講真嗰句好多人即使冇心做嘢都唔願走, 係要浪費人哋d時間同金錢, 班高官真係佼佼者, YA兄舒發完要砌番模型喇, 今日HOBBY JAPEN已經買咗, 隻超3悟空好強嘅製作, 期待你下一個成品.    
    [版主回覆03/13/2011 16:21:00]多謝支持呢~ 其實我當然鐘意玩多D啦~ HAHA 不過有時忍唔住有感慨吧了!  下篇當然繼續講模型呢~ ^^

  9. 有亂世,冇英雄,唉….
    [版主回覆03/13/2011 16:18:00]因為整個社會大部份人, 對參加政治既人有好偏見… 屋企人覺得年青人留意多些就好似入左黑社會咁… 咁點咁容易出到英雄呢?

  10. 香港現在應該都可以叫亂世了吧…亂唔一定單指暴力方面. 香港已經出現了不少問題,原因都非一般的複雜,有些現象如果你有細心想想就是在資本主義規則之下發展到某階段的問題,要避免嗎??看看美帝你會知有結果,而且香港地少人多,這類問題發展出來比美帝有過之而無不及.所以問題不在於我們叫什麼,而是可以點做?? 有一說資本主義出現了500年,支配了地球大部份地方100年以上,可能已經發展了不能解決的問題而需要改變,甚至消失,而香港卻是地球上最奉行資本主義的地方,那你覺得該好何??現在好多人在爭取的東西其實是很共產主義的,你有留意到嗎??單單均富呢一點就已經同共產主義是不謀而合的,你有留意到當中有多大的問題嗎?
    [版主回覆03/13/2011 16:15:00]嘩~ 老兄你講D野好鬼深喎! 我對回應既大約感覺就好比喻幾十年之後, 香港可能會因水位上漲浸左一半咁, 我地點努力都制止唔到的了~ 但事前有準備就可以好似日本地震完咁, 震完大家無無亂到, 可以將受害情況減到最低吧了! 每次同你出去食飯都學到唔小野, 由玩具到美漫到社會狀況到人生晢學~ 真係好鬼正! 上次出黎聽到你講幾年後香港得返一半人, 都好想知多一點呢!

  11. 聽下哩個SHOW ,好有 POINT~!
    [版主回覆03/13/2011 16:07:00]雖然有幾處同當日情況有點出入, 個節目主持都算好中肯喎! Bookmark左先~ THX! 其實當日在打小人時已講明人民力量無申請到個牌上政府總部, 一早叫人到時可以自行散步上去的了~ 我都支持唔大隊上去, 因為上面又有民主黨, 又有社民聯, 兩邊都係佢地不滿既組織, 上到去小側比人騎劫人數, 大側口角衝突, 到時又會比機各媒體又亂咁大造文章… 不過我都覺佢最後果下做得唔太好, 主要係交待唔清楚, 我坐係中間都聽唔到佢地講乜, 無乜結尾就突然解散了~

  12. HI!! 我只是係途人 "甲" ,我也有你樣情況!!   ADD OIL!!
    [版主回覆03/11/2011 10:22:00]大家加油!

  13. 都係果句啦 香港而家並唔係67年果時咁…可以上下街就可以改變 一切既年代 香港政府唔識自救根本無用… 我呢d80後只有做好自己啦…雖然… 份糧根本唔夠食…只夠你生存… 社會係應該要求同存異的
    [版主回覆03/11/2011 10:15:00]無心無力介入就專注生活,  這不是錯~ 無人迫人一定要做什麼啊~ 我只是不忿, 好多朋友對發表一下政治立場就立即被人帶上有色眼鏡… 仲要聽佢地比人誤導了的言論… 有些感慨吧了~

  14. 我都有同你去,我都在場睇到事件0既一部分,估唔到你係咁認真去睇呢種事
    我完全認同你0既睇法,係 3 月 6 日,有 1 萬人出去遊行,佢地唔係衣衫殘舊黎做戲0既 "義工" ,好大部份係過 30 歲,衣著光鮮,手執 iphone ,名貴相機,點睇都唔似係搵緊最低工資,好需要政府救命個班,仲要係有老有嫩、一家大細或者兩老一齊出席,而且仲係每人都剛剛收左政府 6k ,點解仲要行出黎?  真係得閑無野做?真係為反而反?     佢地可以話係交稅最多福利最少0既一堆人,成唔成功爭取到對佢地影響有幾大?
     
    有無唸過佢地為乜出黎?    點解佢地今次會咁主動而唔係繼續冷眼旁觀?
     
    聽見好多人話做呢 d 野無用浪費時間,宜家有人爭取到成果番黎就識得開心,分享到成果時有無唸過自已付出左咩呢?   你玩樂時人地就默默耕云,你身雕肉貴唔願意做有人開埋個頭,只係去到關鍵時刻想大家出黎多一分力用行動比無良政府睇佢有幾唔掂都咁難,人民自已都闊佬懶理,政府點唔會變本加厲?
    唔係針對呢度回應0既 blog 友,識你地都知你地係好人,只係見到好多人都有咁0既睇法。但有些觀點我唔會妥協
     
    幾十人沖擊警方就用黎抹黑成個和平理性遊行,媒體夾埋只係單方面報導負面野,剝削市民知情權,你有無係電視新聞睇到鬍X曾比人當小人打0既鏡頭,當日市民對住電視台鏡頭呼叫雙曾落台0既場面有無得睇?用少少手段就轉移視線避開市民圍攻,去掩飾自已先係當日事件0既源頭…
     
    無發覺無傳媒在場, 他們會同警察有說有笑好和平, 但一有鏡頭影住就另一回事好似標童上身咁<<  這有問題嗎?似做 show?  我反而覺得佢地先係最清醒,知道爭取只係佢地0既工作,番工就十足投入,放工就知道自已0既角色係普通市民,若果帶頭個班人係 24 小時都失理性搞對抗的話,咁就唔係為增取福利,而係惡劣到為生存
     
     
     
     
    [版主回覆03/11/2011 10:28:00]非常同意! 各大傳媒同政府不停抺黑或誇大對立暴力情況, 就係想大眾厭惡出黎主動反映自己意見既行為, 令大多數人認為參加依一類活動, 就係唔理性, 一係話比朋友話做忿青, 一係就比人話比政黨洗腦… 總之覺得係好唔理智…好多負面野… 好多人覺得冷眼旁觀就最理志最聰明, 隨便係一些不負責任既大眾傳媒接收訊息後, 甚至不分表紅皂白, 人云亦云地企硬支持一些錯誤的立場… 真係好可悲…. 其實知多些政治, 唔等如一定要去參政, 香港人多點政治智慧, 至起碼唔會比有心人亂咁利用吧! 果日參加遊行我係想親身睇下人民力量係乜野組織, 佢地既行動策略混唔混亂, 及黃毓民脫離左社民連後佢既影響力等~ 研究下當如果第二時又有23條立法, 咁多反對派出黎行, 究竟邊一個社團或發起人係真正為大眾服務, 有統籌能力等! 唔好join錯隊都好緊要的啊! 自己睇完當日實際情況, 再分析一下各大傳媒既報導, 就更知佢地用什麼立場寫槁了! 我同lastman一樣諗法, 我唔想"人爭取到成果番黎就識得開心" 咁太自私了!

  15. 熊霸免傷和氣, 我一向都唔喜歡講政治, 因為沉不住氣可能連朋友都無得做~ 因見你突然說些我估不到會說的話, 又好似唔開心, 所以才答你只係想你不要太執著, 菜園村事件, 你以為我不清楚, 我只會答你我識姓文同姓鄧的人. 要管的管不了, 煩事如銀河星數, 放鬆吓啦~ 香港人~
     
    我都係時候收聲了~~ 繼續砌模型~~
    [版主回覆03/10/2011 20:26:00]哎吔~ 唔好咁講啦~ 觀點角度問題… 我反而怕你會錯意嬲左我喔! 我都係發洩下之麻~ XD 其實我都覺我專心砌模型好D, 始終政治唔係我專長, 只係想知多D唔比人咁易呃, 變成支持了一些不應該支持的言論而已~

  16. 好鳥, 最後回覆, 亦都係同你傾左少少的睇法
    而政治有幾黑暗? 示威者同警察講乜大家又唔知, 何況示威者係為政府施政不當去示威, 又唔係為衝擊警察示威, 之前同警察有說有笑有什麼出奇? 而各媒體show出黎既片都有剪輯既, 都唔係事實全部, 自己又無在場睇, 幫一邊都對另一邊好唔公平啦
     
    同一道理…
    好似菜園村新地段比地霸收高昂路費先入到村事件, 高鐵強拆人地個就快有收成既農場, 等人地過唔到冬都要迫人地走, 但又走唔到新地方安居等… 更黑果D攝影機根本拍不到吧 ? 仲要有好多大家所謂好偏激既80後自發幫手搬村, 大家又知幾多?
     
    你係現場嗎?
     
    大家收料照片都係咁多(不過你應該多d), 點解你一口咬定別人人云亦云, 自己就明白事理(你可能講你都唔係明白好事理, 但暫時當你係)?又唔講其他人, 以我自己為例, 你有問我嗎?我講幾句你就當我係, 咁不就是霸佔道德高地去批判世人的姿態嗎?
    唔講, 唔代表我冇留意時事, 唔理, 係我現在對社會的不滿, 不過我老喇, d火都冇咩剩, 唯有吹下水only. 但唔代表我的立場係你所想?
    我只係相信, 光說不練是沒用的, 所以我就自己收皮好鳥~
    咁..你..呢? 
     
    [版主回覆03/10/2011 17:18:00]講真,  平時玩樂post認真咁回應就真係輸了, 不過今次真係唔認真得~ 唔係會比人扭曲我原意! 1.我絕對唔係想乜道德高地, 道唔道德是靠一個篇文及回應就有嗎? 爭依D好無謂~  2.亦都唔係唔順氣想駁嬴人, 動氣更易令事情是非不分~ 唔通用曲解左既道理駁嬴就可以叫事實? 3.我回應同左大力士咁多不同觀點, 解釋左同警察有講有笑唔等如班人做show咁做喎, 咁要一口咬定嗎? 係我文筆唔好定你理解錯誤呢? 4.出依一篇只不過覺得近排在fb發洩一句就引起咁多回響, 之後更發覺身邊好友好多都誤解左我而宣洩一下而己, 點睇我都唔似忿青吧~ (不但年紀上~XD)  而菜園事件你只要有心想知, 努力找多方面消息, 分析一下利害關係, 應該都有事實既大慨吧? 何況我主文都無重點題出, 只作回應既例子比大力士參考啊! 我post太多資料~唔睇既都唔會睇, 有心就自己深入D找仲好~ 而只有我出值既活動口講無憑~ 不過其中一次維園都有同蟹Sir去~ 你可以問下佢~ 而且我絕對唔係乜唔係智者, 乜聖人! 只不過睇完一些報導後, 真係仲有好多野唔明,  所以3月6日就用行動, 親自去參加遊行睇下了! 同行仲有ballkai夫婦, Lastman, 高地~ 咁算唔算光說不做呢? 而你會唔會變成為駁而駁呢?

  17. 雖然唔想講, 但都想問一句…
    以上我同你的討論, 係只有我同你定其他人?
    你心淡還心淡, 隔岸觀火都算, 指黑為白, 唔通就叫清高?<–全部都係講我吧?
    而主要想講, 大家唔睇唔諗清楚就亂幫其中一邊說話, 就是指黑為白了~ <–點解又會變左"大家"o既?
     
    [版主回覆03/10/2011 15:47:00]我文筆唔係咁好~ 唔係淨係針對你啦! 咁又真係有一D人都係同你一樣咁諗麻~ 我覺得好多人都唔係壞人, 但個個人唔睇清楚就幫錯邊等同助紂為虐! 所以果句就變左大家了~

  18. 原來我誤會了你, 真的對不起
    你有貼其他論點? 但你明不明白我說的其他論點曷什麼論點, 不過你應該都有吧, 反正我不是你篇篇文都去睇…
    呢個係你俾我的個人觀感, 但原來你今次的主題係講:
    "深入D睇依D事嘈到咁大, 只不過係各方面既工具黎~ 政府想分化轉移視線, 媒體嘩眾取竉令多D讀書睇佢有乜獨家料"
    既然你口中說"始至終無話邊一邊黑, 邊一邊白, 所有事都有因由, 警察清場我又無話佢唔啱, 人民抗爭就一定係錯喎!"
    我想, 你舉左A,B,C,D….咁多樣野, 呢今次係咪想講 "媒體嘩眾取竉"?
    早d 講嘛, 呢點我好認同, 同我好鍾意睇o靚毛係一樣~
    不過有樣野唔係好明…心淡還心淡, 隔岸觀火係我而家o既取態
    清高? 我認架~但我有邊一句令你覺得我指黑為白?
    願聞其詳
     
    [版主回覆03/10/2011 14:41:00]但你只提你喜歡的人o既好同唔喜歡的人o既唔好…世界不是非黑即白, 可能你太理想吧~ ↑只係想回應這一句~ 而主要想講, 大家唔睇唔諗清楚就亂幫其中一邊說話, 就是指黑為白了~ 我睇野好彩色, 好少分黑白, 用"因果"睇野會豐富多一點~

  19. 我覺得熊霸大個仔咗(雖然真係好大個)
    當然唔嘈無noise, 傳媒就無興趣報導你, 而果50人攪事的咪又係借萬多人出來行來壯大聲勢, 仲話萬多人係撐佢地囉(但實情是真的嗎?), 政治嘢都係做show居多, 你無發覺無傳媒在場, 他們會同警察有說有笑好和平, 但一有鏡頭影住就另一回事好似標童上身咁, 太過放在心真係好傷身架~
    我們活在當下的, 只有兩條路可選擇, 1)開心地過活, 2)唔開心地過活, 想通了, 你就會到另一階段了~
    [版主回覆03/10/2011 14:28:00]哎吔~ 我不嬲都有留意啦, 不過有時真係見大家平時無傾開依一方面, 所以都唔講吧了~ 而政治有幾黑暗? 示威者同警察講乜大家又唔知, 何況示威者係為政府施政不當去示威, 又唔係為衝擊警察示威, 之前同警察有說有笑有什麼出奇? 而各媒體show出黎既片都有剪輯既, 都唔係事實全部, 自己又無在場睇, 幫一邊都對另一邊好唔公平啦 所以依D未叫人云亦云攞~ 而且比鏡頭影到既政治SHOW都係算好膚淺既事, 好似菜園村新地段比地霸收高昂路費先入到村事件, 高鐵強拆人地個就快有收成既農場, 等人地過唔到冬都要迫人地走, 但又走唔到新地方安居等… 更黑果D攝影機根本拍不到吧? 仲要有好多大家所謂好偏激既80後自發幫手搬村, 大家又知幾多? 而我只係唔想選擇無知地開心過活吧了~

  20. 其實你也不必感慨,一來現在的情況與「亂世」還差那十萬九千里,胡椒噴霧算老幾?!相比起外國的示威,大家還算很井底之蛙。二來香港人是聰明的,兩方面都會吸收教訓,下次應付得更好。三來現在是在政府有大把錢的情況下出了亂子,等到無錢時出亂子才來擔心吧!凡事也不需祇向壞的情況去想,重要者是能夠總結經驗。就好似現在香港政府無能,是百份百的壞事嗎?或者這情況正好又再一次告訴中央政府,過去十多年,兩位特首的管治模式都有問題;甚至乎是逼令中央反思,沒有民意基礎的特首在議會政治中祇有捱打的份。失敗並不可怕,最可怕的是不能在失敗中成長!
    [版主回覆03/10/2011 13:26:00]無錯, 你講得好啱! 成件事根本就係別有用心既人, 將小小事攪大佢轉移真正有問題既地方… 特別係… 好多身邊朋友都被誤導… 仲要理真氣壯咁為錯既事企硬立場…

  21. 點解"無啦啦比人話情緒咁唔穩定"?
    同你平時形象唔同嘛~冇錯, 玩玩具都可能關心時事, 但呢期你真係留意多左, 除左認同, 同意同非常認同外, 都不曾見你提過另一邊的論點.
    所以D人咪以為你升呢變左憤青囉
    政棍係睇對面出咩佢就插佢另一面做得唔好的騎牆派, 但你只提你喜歡的人o既好同唔喜歡的人o既唔好…世界不是非黑即白, 可能你太理想吧
     
    所以我都心淡鳥, "烹羊宰牛且為樂, 會須一飲三百杯"係我而家o既寫照..
    [版主回覆03/10/2011 11:28:00]另一邊論點我都有貼, 你無睇到之麻~ 同埋提左什麼我喜歡什麼人既好? 唔喜歡既人唔好? ↑依一個唔係論點之一黎咩? 你都好矛盾喎~ 何況我只係話唔喜歡D人麻目咁相信主流媒體,  唔喜歡D人知少少就人云亦云喎! 你好似扭曲左我想講既野~ 同埋我由始至終無話邊一邊黑, 邊一邊白, 所有事都有因由, 警察清場我又無話佢唔啱 人民抗爭就一定係錯喎! 只係講深入D睇依D事嘈到咁大, 只不過係各方面既工具黎~ 政府想分化轉移視線 媒體嘩眾取竉令多D讀書睇佢有乜獨家料 你心淡還心淡, 隔岸觀火都算, 指黑為白, 唔通就叫清高?

  22. 我要重新認識你了……
    [版主回覆03/10/2011 10:16:00]哎呀~  我講野無大家咁叻… 一時間表達到想講既野… 你地唔好成日以為我只識玩至得架…

  23. 8月6日發生了什麼事?
    [版主回覆03/10/2011 09:12:00]哎呀~ 應該3月~ 一時手快添!
    謝謝指正啦~

發表迴響

你的電子郵件位址並不會被公開。 必要欄位標記為 *


*